30 personar døydde på jobb i fjor, eit av dei høgaste tala dei siste ti åra. Dei vanlegaste ulykkene er trafikk- og klemulykker.
– Kvart arbeidsskadedødsfall er djupt alvorleg. Bak tala står menneske som ikkje kom heim frå jobb, familiar som har mista nokon dei er glade i og kollegaer som er i sorg, seier direktør Ingvill Kvernmo i Arbeidstilsynet i ei pressemelding.
Dei siste ti åra er det berre i 2021 at talet var høgare.
Halvparten mista livet i trafikk- og klemulykker: Åtte i trafikkulykker og sju i klemulykker.
Tidlegare år har fallulykker vore blant dei vanlegaste ulykkestypane, men i 2025 omkom to personar i fallulykker, skriv tilsynet. Dette er færre enn gjennomsnittet dei siste ti åra.
Flest menn
Dei fleste dødsfalla skjedde innanfor industri, og innan jordbruk, skogbruk og fiske. Andelen dødsfall innanfor desse næringane auka i fjor og ligg på eit høgare nivå enn dei siste ti åra.
Av dei 30 som døydde på jobb i fjor, var heile 29 menn. Arbeidstakarar over 55 år var overrepresentert, noko som er i tråd med tidlegare år. Nær halvparten var i alderen 55 til 67 år.
Alle fylka, med unntak av Finnmark og Agder, hadde arbeidsrelaterte dødsfall i fjor. Flest av dei skjedde i Innlandet, med sju døde.
Utryggleik blant barnevernstilsette
Arbeidstilsynet viser til at éin av dei 30 som døydde på jobb i fjor, var Tamima Nibras Juhar. 34-åringen var på jobb ved eit forsterka barnevernstiltak på Kampen i Oslo, då ho vart knivdrepen av ein 18 år gammal bebuar. Den unge mannen er sikta for drap og terror, og han har forklart at drapet var politisk motivert.
– Det er viktig for Arbeidstilsynet å ha høg merksemd på det førebyggjande arbeidsmiljøarbeidet i barnevernet, særleg med tanke på å vareta tryggleiken til arbeidstakarane, seier Kvernmo.
Tilsynet viser til ei undersøking frå 2020 som viste at nær 30 prosent av barnevernstilsette hadde vore utsette for vald meir enn to gonger dei to tidlegare åra.
– Verksemdene må sjølv ta tryggingsansvar
Elles påpeikar tilsynet at dei jamleg avdekkjer brot på arbeidsmiljøregelverket som kan utsetje arbeidstakarar for fare:
– Mange av arbeidsulykkene vi følgjer opp med tilsyn, viser at ulykkene kunne ha vore unngått. Derfor er det avgjerande at arbeidsgivar gjennomfører gode risikovurderingar og set inn tiltak som fjernar eller reduserer risiko for ulykker og skader. Kvar risikoen er størst, varierer frå arbeidsplass til arbeidsplass.
– For å førebyggje arbeidsulykker må vi jobbe saman. Samtidig er det verksemdene sjølv som kvar dag må ta ansvar for tryggleiken på arbeidsplassen, seier Kvernmo.
(©NPK)