I november 2024 foreslo Sparebankutvalget å kutte ut kundeutbytte frå sparebankar, noko Finanstilsynet støttar.– Bruk av kundeutbytte skaper ein marknad der det er vanskelegare for kundar og eventuelle rådgivarar å samanlikne prisar mellom bankar. Finanstilsynet meiner det svekkjer konkurransen i marknaden og er samla sett til ugagn for kundane.
Det skriv Finanstilsynet i høyringssvaret sitt til Sparebankutvalgets rapport, som vart lagt fram i november i fjor. I rapporten foreslår utvalet å avskaffe tilgangen sparebankane har til å kunne utbetale utbytte til kundane.
Døme som er referert i rapporten frå utvalet, viser at kundar med store bustadlån og innskot kan få over 12.000 kroner i kundeutbytte i enkelte sparebankar.
Vil ha avvikling av kundeutbytte
Finanstilsynet støttar forslaget frå utvalet om å avvikle tilgangen til å betale ut kundeutbytte.
– Finanstilsynet (…) ser at bankar med kundeutbytte framleis presenterer kundeutbytte som ei påskjønning for kundelojalitet, under dette tilbyr kalkulatorar for å estimere kor mykje utbytte ein kunde kan forvente å få og opplyser om effekten av kundeutbytte i lånetilbod, skriv dei.
Tilsynet meiner at utbytte og marknadsføringa skaper uheldige forventningar om regelmessige utdelingar blant kundane. Dei meiner også at eit slikt utbytte kan forverre den økonomiske situasjonen for banken i periodar med låg lønnsemd.
Sparebankane: – Vil styrkje forretningsbankane
I eit debattinnlegg i Dagens Næringsliv søndag forsvarte toppsjefane i Jæren Sparebank, Sparebank 1 Austlandet, Rogaland Sparebank, Sparebanken Sør og Sparebanken Vest ordninga med kundeutbytte.
– Å fjerne kundeutbytte vil ikkje gjere noko anna enn å styrkje forretningsbankane og svekkje konkurransen. Då bør ikkje konklusjonen vere å fråta nærare 1,3 millionar sparebankkundar moglegheita for kundeutbytte i ei krevjande tid med høge renter, skreiv dei. (©NPK)