Sidan 2005 har Oslo kommune gjennom næringsselskapet Oslo Business Region, tidlegare kjend som Oslo Teknopol, vore vertskap for Oslo Innovation Week.
Dette er på sett og vis "Arendalsuka" for techentusiastar, nyskaparar, såkorninvestorar, marknadsførarar – unge som eldre drivne av entusiasme og framtidstru. Brorparten av innsatsen til næringsselskapet, der kommunen sidan 2005 har spytta inn samla rundt 300 millionar kroner, er fokusert på nettopp Oslo Innovation Week.
Oslo Business Region rapporterer at det årleg deltek 15 000 pesonar frå heile verda i løpet av veka, der det i år er registrert over 60 ulike møter – eller eventer som arrangøren nyttar som omgrep. All kommunikasjon knytt til OIW går nemleg på engelsk:
"Be part of the changes that trigger significant impact. Oslo Innovation Week showcases the ideas, innovations and individuals that push boundaries, creating a better future", lyder ein av dei mange slagordprega kommunikasjonstekstane på tilstellinga si nettside.
Men den tematiske undertittelen på innovasjonsveka for 2023 er "The tipping point", for dei akkrediterte møtearrangørane skal søke å svare på FNs bærekraftmål. Det har vore tradisjon sidan bærekraftmåla vart introdusert.
- Framtidsretta veteran
Blant møtearrangørane er den framtidsfokuserte medieveteranen Morten Myrstad (68). Han markerer seg med møtet "Unleash" på Pressens Hus. Ifølge Myrstad er dette det aller første større møtet i Norge der "web3", det tredje internettet, er hovudtema.
– Det er stor interesse for web3 der ute, men det har ikkje funnest gode medieplattformer, møteplassar eller digitale fellesskap som har gjort det muleg å møtast til kunnskapsutvikling og nettverksbygging, seier Myrstad. Han gjekk i 2022 attende til journalistikken etter rundt 30 år i kommunikasjon og strategi, og han er mannen bak den nye publikasjonen Kaupr med fokus på digital og virtuell økonomi der han er utgjevar og redaktør.
– Kvifor satsar du og Kaupr på eit møte i Oslo Innovation Week?
– Eg bygger Kaupr som eit moderne medieselskap, der det er naturleg å dele nyheiter, innsikt og debatt ikkje berre i tradisjonelle publikasjonar, men og på Youtube, i sosiale media, nyheitsbrev og event som Unleash-konferansen.
– Kva er unleash?
– Møtet søkjer å gje svar på korleis framveksande teknologiar som web3, ai, ar/vr og data vil ta del i å forme internettet i framtida. Eg ser fram til tysdagen i Pressens Hus, der eg skal leie det spennande Unleash med 18 deltakarar som vil delta med foredrag, intervju og paneldiskusjonar på scena.
– Kva er forskjellen på dagens internett og det tredje nettet?
– Etter to generasjonar internett – web1 med lesetilgang på 1990-talet og web2 med sosiale medier, mobil og interaktiv kommunikasjon der dei store teknologiselskapa har kontrollen – vil web3 gjere det muleg å gje brukarane kontrollen attende.
– På kva måte?
– Det er den desentrale blokkjedeteknologien som muleggjer dette, samstundes som kunstig intelligens kombinert med utvida verkelegheit og virtuell verkelegheit, ein altomfattande – immersiv – teknologi bidreg til å skape relevante og gode brukaropplevingar. Web3 gjev brukarane lovnader om å kunne vinna att kontrollen over eigen profil, innhald, nettverk, data og økonomi via desentrale nettverk utan mellommenn.
– Men var ikkje dette og grunntanken til oppfinnaren av web1, Tim Berners-Lee?
– Jau, men då web2 kom med sosiale medier, mobil og interaktiv kommunikasjon har dei store aktørane som Google, Meta, Amazon, Microsoft, Apple og andre teke kontrollen og skapt plattformøkonomien der vi som brukarar er blitt eit produkt utan eigarskap.
- Forventningar
Myrstad er full av energi med tanke på møtet under Oslo Innovation Week, og over 500 personar frå dei nordiske landa er direkte engasjert. Fysisk i Pressens hus vil over 120 møte fram, og tusental er venta å klikke innom digitalt i maratonmøtet på sju timar. Det blir sjølvsagt strøyma direkte.
– Både med dette møtet og gjennom Kaupr har vi skapt nye møteplassar som gjer det muleg å hente informasjon, knyte nye kontaktar og føle seg som ein del av eit fellesskap, seier redaktør og nyskapar Myrstad.
Han opplever at tida no er inne for å snakke om ein "kryptovår" etter ein periode med "kryptovinter" der mykje av nyskapinga med blokkjedeteknologien har vore gjennom ein bølgedal etter etter store finansielle svingingar, store kursoppgangar og like store kursfall der formuer er skapt og der formuer har blitt borte.
– Kva er status for det tredje nettet?
– Dei neste par åra trur eg vi vil sjå lanseringar av ei rekkje web3-baserte løysingar som vil overraske svært mange som kanskje har vore overtydd om at blokkjedeteknologien berre kunne ignorerast. Skaparkrafta er stor.
Myrstad viser til at medarrangør Web3 Society ved Handelshøgskolen BI har 150 studentar som medlemar.
– Blant dei påmelde til Unleash er mange gründerar, startups, forretningskutviklarar og investorar som er på leiting etter dei neste nye mulegheitene. Målet er å gjere alle litt klokare og betre førebudd på det nye internettet.