NPK-NTB
Overlevande etter atombombene i Hiroshima og Nagasaki i den japanske organisasjonen Nihon Hidankyō får Nobels fredspris for 2024.
– Dei får prisen for innsatsen sin til å skape ei verd fri for atomvåpen og for å demonstrere, gjennom vitnesbyrd, at atomvåpen aldri igjen må brukast, seier Nobelkomiteleiar Jørgen Watne Frydnes på den tradisjonsrike pressekonferansen på Nobelinstituttet fredag.
Nihon Hidankyo-leiaren seier at han «aldri kunne ha drøymt om å vinne Nobelprisen», skriv AFP.
– Det er ein kraftig appell til verda at avskaffing av atomvåpen kan bli oppnådd, seier leiar Toshiyuki Mimaki ifølgje Reuters.
– Atomvåpen bør absolutt avskaffast, seier han vidare. Organisasjonen er òg kjend under namnet Hibakusha.
– Som svar på atombombeangrepa i august 1945 reiste det seg ei global rørsle med medlemmer som har jobba hardt for å skape forståing for dei katastrofale humanitære konsekvensane av å bruke atomvåpen, seier Frydnes.
Gradvis har norma i det internasjonale samfunnet vorte at det moralsk uakseptabelt å bruke desse våpena.
Vitnemåla frå dei overlevande i Hibakusha har vore unike i denne samanhengen.
Sjølve feiringa av fredsprisvinnaren startar 9. desember, og utdelingsseremonien skjer dagen etter.
NEI TIL ATOMVÅPEN
Nei til atomvåpen om fredsprisvinnaren: – Vi er fullstendig avhengige av desse historieneID: 18851598Vi treng forteljingane til dei overlevande for å halde oppe tabuet mot bruk av atomvåpen, seier Nei til atomvåpen om at Nihon Hidankyō har fått Fredsprisen.
Dette er veldig gledeleg, seier talsperson for Nei til atomvåpen, Philippe Bédos Ulvin.
– Det har kanskje aldri vore viktigare at overlevande får denne prisen, seier han til NTB.
Han seier at mange av dei som overlevde angrepa i 1945, no er i 90-åra.
– Dei er i ferd med å gløyme opplevingane dei har hatt. Vi er fullstendig avhengige av desse historiene for å halde oppe tabuet mot bruk av atomvåpen, seier Ulvin.
ALARMERANDE
Leiar i Nobelkomiteen Jørgen Watne Frydnes seier at dei er bekymra over at atommakter igjen truar med bruk av atomvåpen.
– Det er alarmerande at tabuet mot bruk av atomvåpen i dag er under press, seier Nobelkomiteleiar Jørgen Watne Frydnes i grunngivinga for årets tildeling av fredsprisen.
Nobelkomiteen tildelte fredag Nobels fredspris for 2024 til den japanske organisasjonen Nihon Hidankyō, som består av overlevande etter atombombene i Hiroshima og Nagasaki.
Etter at det vart klart at den japanske organisasjonen Nihon Hidankyō vinn året fredspris, minner Nobelkomiteens leiar om kva atomvåpen faktisk er.
I dag er det fleire krigar over heile verda, og leiar for Nobelkomiteen Jørgen Watne Frydnes påpeikar at fleire atommakter i dag moderniserer og byggjer om våpenlagera sine.
– Nye land ser ut til å førebu seg på å skaffe atomvåpen, og det blir sett fram truslar om å bruke atomvåpen i krigføring, seier han og legg til:
– I verdshistoria vi er i akkurat no, er det derfor verd å minne oss om kva atomvåpen er: Det mest øydeleggjande våpenet verda nokon gong har sett.
Den japanske organisasjonen jobbar mot atomvåpen og er ei grasrotrørsle med overlevande etter atomangrepa mot Hiroshima og Nagasaki for snart 80 år sidan.
Statsminister Jonas Gahr Støre (Ap) gratulerer fredsprisvinnaren og seier at vinnaren i år er ei nødvendig åtvaring til dei som truar med atomvåpen.
– Dette er ein viktig pris, som også viser kor viktig arbeidet til ei slik folkeleg rørsle kan vere. Prisen er ei påminning om kvifor vi må framleis jobbe for både nedrusting og ikkje-spreiing av atomvåpen. Og det er ei nødvendig åtvaring mot dei som kjem med direkte truslar om bruk av atomvåpen, seier statsministeren.