Regjeringa vil rydde opp i «Texas-tilstandar» i drosjenæringa, og strammar inn på fleire område. Mellom anna må drosjane igjen knyte seg til ein sentral.
Han vil ikkje kalle situasjonen i taxinæringa for «lovlaus», men han meiner regelverket fungerer svært dårleg etter frisleppet frå den førre regjeringa.
– Vi ønskjer ein meir regulert bransje fordi det skal vere lettare og meir føreseieleg å vere taxisjåfør og jobbe i yrket. Men også for at det skal vere lettare for dei som tek taxi. At det er ein trygg og regulert marknad, seier finansministeren.
– Kva tilstandar blir det no? Norske tilstandar?
– Det er den norske modellen.
- Fleire innstrammingar
Saman med samferdselsminister Jon-Ivar Nygård (Ap) tok Vedum turen til drosjehaldeplassen på Oslo S tysdag formiddag.
Der kunne dei presentere følgjande forslag, som blir lagde fram denne veka:
* Plikt om at alle drosjeløyvehavarar må knyte seg til ein sentral
* Sentralane må samle inn, lagre og sende over informasjon til styresmaktene, mellom anna om prisar.
* Sentralane må ha ei klageordning, og ein viss del av bilane må kunne transportere folk med nedsett funksjonsevne
* Betalinga må registrerast i taksameter hos sentralen
- Overetablering
På Oslo S var køen med ventande drosjar lang tysdag formiddag. Sjåførar NTB snakka med, fortalde om dagar med ventetider på fleire timar for å få kundar.
– Det frisleppet Høgre-regjeringa leverte, har ført til at taxinæringa har fått utfordringar. Det har vorte overetablering i byane og eigentleg ei utarming av tilbodet i distrikta, seier Nygård.
Der drosjane i hovudstaden tidlegare var tilknytt sentralar og hadde logo og profilering frå dei ulike sentralane, er det no berre eit fåtal som har det nokon logoar på bilane sine.
I tillegg har mange taxikundar rapportert om sjokkprisar når dei har praia taxi på gata dei siste åra. Nygård trur dei nye grepa kan gi meir stabile taxiprisar.
– Dette med sentraltilknyting betyr at vi som taxikundar får ein sentral å ta omsyn til. Viss det skjer noko i taxien, eller du får ein pris du ikkje er nøgd med, så finst det ein stad du kan vende deg til, seier Nygård.
- – Ikkje reversering
Både Vedum og Nygård avviser at dei ønskjer å stenge ute multinasjonale techselskap som Uber og Bolt frå den norske marknaden.
– Men no kan du vite at når du bruker ein app, så er det også regulert. Det er norske tilhøve som ligg bak. Du skal gjennom ein sentral, seier Vedum.
Nygård understrekar at turen skal registrerast i eit taksameter også når ein bruker app.
– Det skal vere anstendige og ordentlege vilkår for kundar og for dei som jobbar i sektoren, seier han.
Samferdselsministeren vil ikkje kalle endringane for ein «reversering» av taxireforma til Solberg-regjeringa. Heller ein «forbetring».
– Målestokken er ikkje at det skal vere akkurat slik som før reforma, men vi skal ramme dette inn på ein god måte, seier han.
- Varslar fleire grep
Regjeringa har allereie gjort nokre grep på taximarknaden frå 1. januar i år. Mellom anna krav om taklykt, at drosjane må registrere seg og dokumentasjon for taksameter.
Neste år kjem del to av rapporten frå drosjeutvalet til regjeringa.
Planen er også å komme med endå fleire grep neste sommar, men regjeringa må også forsikre seg om at «den norske drosjemodellen» passar inn i EØS-regelverket.
– Vi må vere sikre på at endringane ikkje berre blir vedtak i Stortinget, at det faktisk blir røyndom. Eg har merka at det har vore utolmod, men vi jobbar målretta, seier Vedum.
(©NPK)