Byggjebransjen vil få mange oppdrag for Forsvaret framover, etter at regjeringa no legg opp til å bruke 1624 milliardar på forsvar fram til 2036. – Eg trur det vil vere ganske velkomme, seier statsminister Jonas Gahr Støre (Ap).
– Bygg- og anleggssektoren i Noreg slit. Så når vi no skal reparere bygg, byggje nytt, gjere elektronisk arbeid knytt til byggjeinstallasjonar, så kan det mange stader i landet vere ei kjærkommen oppgåve, seier Støre til NTB.
For å støtte opp under den omfattande styrkinga av Forsvaret må bygging og utbetring av bygg og anlegg skje mykje raskare enn før, heiter det i regjeringsforslaget til langtidsplan for sektoren. Regjeringa vil leggje til rette for at Forsvarsbygg kan samle fleire prosjekt i større pakkar for å gjere det meir attraktivt for entreprenørar. Men ho vil også leggje til rette for at små og mellomstore bedrifter i distrikta får oppdrag.
– Dette kan til dømes gjerast ved å stille krav til ein del lokale tilbydarar i ein større entreprise, heiter det i forslaget.
600 NYE MILLIARDAR
Regjeringa vil styrkje forsvaret av Noreg med 600 milliardar kroner dei neste tolv åra, går det fram av forslaget sitt til langtidsplan for Forsvaret. På førehand var det varsla ei kraftig opptrapping av heile forsvarssektoren og særleg Sjøforsvaret.
Samla vil regjeringa dermed bruke 1624 milliardar kroner frå 2025 til 2036.
– Vi treng eit forsvar som er tilpassa dagens situasjon og trusselbilete. Denne planen er eit historisk løft for Forsvaret, seier statsminister Jonas Gahr Støre (Ap).
– Vi har ein økonomi som tillèt ei slik satsing, men det vil krevje prioriteringar.
FREGATTAR OG LUFTVERN
Blant satsingane regjeringa foreslår er:
* Minimum fem nye fregattar med anti-ubåt helikopter og minimum fem ubåtar. Det skal utviklast og skaffast ein standardisert fartøyklasse med inntil 10 store og 18 mindre fartøy.
* Hæren skal aukast frå éin til tre brigadar.
* Dobling av NASAMS-kapasiteten til åtte batteri.
FLEIRE SOLDATAR
– Vi må ha eit forsvar som førebyggjer konflikt kvar dag og som er førebudd på at konflikt likevel kan hende. Auka aktivitet føreset fleire folk. Forsvaret skal styrkjast med over 20.000 vernepliktige soldatar, tilsette og reservistar til saman, seier forsvarsminister Bjørn Arild Gram (Ap)
Forsvaret skal få 4600 fleire fast tilsette, 4600 fleire vernepliktige og 13.700 fleire reservistar. Heimevernet blir auka til 45.000.
Gram varslar behov for meir bygg, auka utdanningskapasitet, og midlar til å fylle opp beredskapslagera.
ØNSKJER BREI SEMJE
Forslaget er sendt til Stortinget. Der håper regjeringa på brei semje om planen, og det har vore kontakt med partia på Stortinget allereie før planen var klar.
– Regjeringa takkar for konstruktiv dialog med alle partia og inviterer Stortinget til eit breitt forlik om dette forsvarsløftet. Det har mykje å seie at vi står saman om å tryggje Noreg, seier Støre.
DROPPAR EIGE VERN AV OSLO
Noreg skal kjøpe langtrekkjande luftvern som skal verne mot ballistiske missil med kort rekkevidde, men eit permanent eige luftvern for Oslo er ikkje aktuelt.
– Det nye luftvernet gir høve til å verne hovudstadsområdet, viss vi reknar det som mest påkravd. Luftvernet er mobilt, men kan stå lenge i ro på same plass, sa forsvarsminister Bjørn Arild Gram (Sp) på pressekonferansen under framlegginga av langtidsplanen for Forsvaret.
For å auke vernet mot truslar frå lufta, foreslår regjeringa å skaffe fire nye Nasams-batterisystem til Luftforsvaret og Hæren. Det er ei dobling i forhold til i dag.
Luftvernssystem som er donerte til Ukraina, skal erstattast. Både Luftforsvaret og Hæren får fleire system og dagens luftvernssystem skal oppdaterast.
– Det er ei stor satsing på luftvern i denne langtidsplanen. Rundt 90 av dei 600 milliardane går til luftvern, understrekar forsvarsministeren.
ETTERLYSER OSLO-VERN
Frps forsvarspolitiske talsperson, Christian Tybring-Gjedde, er blant fleire som har etterlyst eit eige luftvern for hovudstadsområdet.
– Vi set spørsmålsteikn ved at Oslo og dei større byane ikkje blir prioriterte med luftvern. Slik vi ser frå Ukraina, er luftvern heilt avgjerande. Spesielt må hovudstaden sikrast med permanent luftvern, seier han.
Venstre-leiar Guri Melby peikar også på Russlands krigføring i Ukraina.
– Der ser vi at vi i Noreg treng luftvern og vern mot missil. Venstre meiner at vi må verne både militære og sivile mål. Eg er usikker på om det regjeringa legg opp til, er nok – og ei innfasing frå og med 2033 verkar uansett seint, seier ho.
REKORDTUNG SATSING
Gram seier han rekna med at nokon alltid ville ønskje seg meir frå forsvarsplanen, men understrekar at den foreslåtte satsinga til regjeringa på luftvern er rekordtung.
– Vi har prioritert luftvern, det er ein av hovudprioriteringane våre. Det er den største satsinga etter den maritime satsinga, seier han til NTB som svar på Frp-kritikken.
– For første gong kjøper vi også langtrekkjande luftvern som kan verne hovudstaden eller andre stader der det trengst, seier han.
– Ein må rekne med at det alltid vil vere nokon som ønskjer seg meir, seiier forsvarsministeren.(©NPK)